شاشة جوال : مصطلحات سوق الاتصالات

مصطلحات_سوق_الاتصالات

بسم الله الرحمن الرحيم

انكسرت شاشتك . معوض خير … أكيد رحت للسوق بتغير الشاشة ودخت من كثرة المصطلحات الغريبة واحترت من كثرة الخيارات و من كثير من المصطلحات الي تستخدم في السوق وماتعرف معناها.

في هالمقال بنحاول نشرح أهم المصطلحات المستخدمة في السوق ومعناها حتى نساعدك في ايجاد أفضل الشاشات بأفضل الاسعار.

شاشة درجة أولى تجاري

هي شاشة مصنعة من قبل مصانع أخرى من غير الشركة المصنعة للجوال. غالب الشاشات الموجودة في السوق هي شاشات تجارية صينية و بنسنبة أقل تايلندية. طبعا الشاشات التجارية تختلف حسب جودتها و سعرها. الجودة العالية تسمى درجة أ ولى أو (أصلي سوق) وفيها اكثر من نوع حسب القطع المستخدمة فيها (الشاشة الداخلية – كيبل الشاشة فليكس كيبل) وغيرها . وفيه درجة ب وماينصح فيها أبدا.

شاشة أصلية مجددة

أبل ماتصنع شاشات . فلذلك لو حاب تركب شاشة أصلية بتكون مجددة . بمعنى تم أخذها من جوال
أصلي فيه مشكلة ما وتم تغيير الفريم والكيابل (تجديدها) واعادة بيعها وعادة تكون أغلى من التجاري.

شاشة أصلي سوق

اسم آخر للشاشات التجارية درجة أولى . لاأفضل هالاسم عموما لايهامه العميل بان الشاشة أصلية.

درجات الشاشات التجارية

الشاشات التجارية تكون درجة أولى و درجة ثانية .

وتختلف حسب جودة المكونات والمصنع. أشهر شاشات الدرجة الاولى : شنشاو أو تيانما . وتأتي أقل منها كمتوسط لونق تينق و جاي دي اف. وأقل الدرجة الأولى أي يو أو

شاشة داخلية

الشاشة الداخلية هي شاشة ال سي دي مثل الصورة رقم 1

وعادة تباع مع الشاشة الخارجية.


صورة رقم 1

شاشة خارجية

الفريم الخارجي للشاشة وفي حال كان الكسر في شاشة جوالك في الشاشة الخارجية فقط مثل الصورة رقم 2. ولم تتأثر الشاشة الداخلية فيمكن تغيير الشاشة الخارجية فقط أوفر في السعر ولكن الاشكالية في أنها تحتاج جهاز خاص لايتوفر في أغلب محلات الصيانة.


صورة رقم 2

درجة الشاشة AAA

الشاشات التجارية الدرجة الأولى. وهي أنواع كثيرة فوق 6 أنواع وتختلف النوعية حسب المواد المستخدمة في تصنيع الشاشة. وتختلف الاسعار تقريبا من 10 الى 40 ريال .

درجة الشاشة AAA+

الشاشات التجارية الدرجة الأولى ويمثل + أنه أفضل نوعية في الدرجة الأولى. يسمى شنشاو أو تيانما

Schenchao or Tianma

ضمان تشغيل

فعليا مايسمى ضمان ولكن هو يضمن لك ان الشاشة تشتغل فقط وتجربها وانت واقف عند المحل . بمجرد أنك رحت مافيه أي ضمان على الشاشة. لاينصح أبدا بهالنوع من الضمان لانه لايضمن حقك كمشتري وغالبا المحلات الي تقدم هالضمان تكون جودة شاشاتها سيئة ورخيصة ولذلك مايقدر المحل يقدم ضمان للشاشة. قد تظهر مشاكل في الشاشة بعد تركيبها بفترة قصيرة مثل مشاكل اللمس أو الالوان. ولو صار أية مشكلة ماراح تقدر ترجع الشاشة أو تستبدلها.

ضمان ستيكر

هو يضمن لك الشاشة مادام الستيكر موجود عليها. بمجرد أنك أزلت الستيكر يلغى الضمان. عموما هذا أقل ضمان فعلي. يعيب الضمان أنه ماراح تقدر تخلي الستيكر لفترة طويلة لكن ينصح اذا كان الضمان ضمان استيكر انك تخلي الستيكر لمدة يومين أو 3 وغالبا لو الشاشة فيها مشكلة بتظهر خلال هالفترة الا في حالات قليلة.

في حالات كثيرة بعض المحلات تخلي الستيكر الداخلي للشاشة – مثل ماهو موضح في الصورة رقم 3. ويركبها وهالشيء قد يسبب ضرر لجهازك وارتفاع درجة الحرارة. تأكد من انه الستيكر الداخلي تمت ازالته.

الفكرة ان المحل يضمن حقه مع المورد في حال تم ارجاع الشاشة ويقدر يرجعها للمورد مادام الستيكر الداخلي موجود ولكن هالشيء يؤثر على الجهاز تأكد دائما من ان الستيكر الداخلي تمت ازالته.


صورة رقم 3

الشاشة مع الفريم

هالخيار متوفر لشاشات السامسونج خاصة وتكون الشاشة مع الفريم خيار أفضل وأسهل في التركيب لعدم حاجة فني الصيانة الى فك الفريم من الشاشة القديمة ونقلها واحتمالية كسر الشاشة . يعيب الشاشة مع الفريم ارتفاع سعرها قليلا مقارنة بالشاشة بدون فريم ويميزها سهولة تركيبها و قلة خطر كسرها عند التركيب.

في حال وجود أية مصطلحات مرت عليك في السوق وماعرفت معناها أكتبها لنا في تويتر أو في التعليقات وبنحاول باذن الله نساعدك في معرفة معناها.

خالص تحياتي.